O ano Antonio Palacios,
un porriñés universal
Este ano O Porriño celebra o 150 aniversario do nacemento do arquitecto Antonio Palacios. Ademais, conmemora o centenario da inauguración do edificio do Concello, unha das súas obras máis emblemáticas.
O Concello do Porriño deseñou unha ampla programación arredor desta figura universal que foi sempre xenerosa co seu lugar de nacemento.
Antonio Palacios é patrimonio do Porriño.
Antonio Palacios
e O Porriño
“Que Antonio Luciano Juan Palacios y Ramilo naceu na parroquia do Porriño ás dez e media da noite do oito de xaneiro de mil oitocentos setenta e catro na rúa da Praza desta localidade.”
As obras
de Palacios
no Porriño
Para a súa vila natal, Antonio Palacios proxectou catro obras: a Fonte do Cristo, a Escola Fernández Areal (tristemente derrubada), a Botica Nova e o edificio da Casa Consistorial. Ademais, O Porriño resgarda tamén a porta orixinal da entrada ao Metro da Gran Vía Madrileña, popularmente coñecida como Templete. Palacios deixou así a súa pegada no seu lugar de nacemento, definindo con símbolos o seu entramado urbano.
Obras no PorriñoSala de exposicións
O Porriño contará moi pronto cun espazo expositivo dedicado á figura de Antonio Palacios na rúa que leva o seu nome.
Sala de exposicións
O Porriño contará moi pronto cun espazo expositivo dedicado á figura de Antonio Palacios na rúa que leva o seu nome.
A paixón
polo debuxo
Houbo quen aseguraba que cando Antonio Palacios visitaba O Porriño en plena construción do edificio do Concello (1919-1924), achegábase ata os canteiros que estaban a traballar na praza e sacaba un lapis do peto para debuxar sobre a propia pedra e guialos no proceso.
Pero a proba máis emocionante do amor de Palacios polo debuxo son os seus propios cadernos de campo que o acompañaban en excursións e viaxes. Cadernos que son os mellores testemuños da destreza do arquitecto co lapis e nos que debuxou con grande destreza recantos da paisaxe e o patrimonio de Galicia, España e Europa.
Premios
Antonio Palacios
Non hai mellor figura que a de Antonio Palacios para dar nome a uns premios cos que se quere recoñecer e celebrar as contribucións sobresaíntes nos campos da cultura, a empresa, o deporte e o compromiso social.
Estes premios son un testemuño da excelencia e a dedicación de individuos e organizacións que, co seu traballo incansable, enriquecen a nosa sociedade.
Edición 2024
A outra pegada
de Antonio Palacios
Antonio Palacios definiu e caracterizou cada un dos emprazamentos para os que proxectou unha obra. O arquitecto foi deixando a súa pegada dentro e fóra de Galicia deseñando símbolos que quedaron para sempre prendidos nas nosas retinas. Madrid, Galicia, Pais Vasco ou Andalucía, son algúns dos lugares para os que Palacios traballou transformando a súa paisaxe urbana.
Estas son outras das súas obras destacadas, sobre todo, de Galicia e Madrid.
Fonte
da Gándara
MONDARIZ BALNEARIO,
1908 - 1909
Palacios proxectou para Mondariz Balneario o Pavillón da Fonte e a planta de embotellado por encargo do seu amigo Enrique Peinador Vela e a súa familia. Na Fonte da Gándara Palacios amosa unha linguaxe clasicista e, sobre todo, a capacidade para adaptarse aos lugares máis diversos. Esa versatilidade caracteriza toda a súa obra.
Virxe da
Rocha
BAIONA,
1909 - 1930
Con esta obra, o arquitecto cambiou para sempre o ceo de Baiona. Situada no Monte de San Roque, a impresionante escultura que domina o Atlántico, é unha proba de que Palacios sentíase feliz cando traballaba con liberdade creativa e a sabendas de que estaba a crear un símbolo que serviría para promocionar a súa querida terra galega. Como curiosidade, a Virxe da Rocha está case xeograficamente situada enfronte da famosa estatua da Liberdade de Nova Iorque.
Teatro
García Barbón
VIGO,
1911 - 1927
Logo do incendio que arrasou o Teatro Rosalía de Castro en 1910, o dono, José García Barbón, encárgalle os novos planos a Palacios. O arquitecto porriñés proxecta un edificio complexo con tres funcións diferenciadas: cinematógrafo, casino e teatro. O Teatro é un dos edificios máis representativos da cidade de Vigo.
Templo Votivo
do Mar de Panxón
NIGRÁN,
1932 - 1937
En Panxón, sobre un outeiro que mira ao mar e a poucos metros dun arco visigótico conservado, Palacios soñou erguer este templo que significou para sempre o lugar. Un edificio de grande expresividade plástica na que a pedra se presenta cunha forza poderosa. É un dos grandes proxectos galegos de Palacios.
Templo
da Veracruz
CARBALLIÑO,
1943 - 1952
É o grande proxecto de Palacios construido en Galicia de temática relixiosa. A primeira pedra colócase o 26 de xuño de 1943, dous anos antes da morte do arquitecto. O xogo de volumes, a potencialidade plástica do granito, dánlle á obra unha significativa expresividade. Palacios non chegou a tempo para vela rematada.
Palacio de
Comunicacións
1904 - 1919
En 1903, o goberno quixo utilizar unha parte dos terreos do Retiro para a construcción dun edificio destinado ao correo e as telecomunicacións. Para iso, convocou un concurso a nivel nacional que gañaron Antonio Palacios e Joaquín Otamendi. É a obra que impulsou a carreira de Palacios como arquitecto e a que lle abriría as portas para convertirse nun dos grandes “construtores” do Madrid moderno.
Banco Español
del Río de la Plata
1910 - 1918
As cariátides deste edificio, hoxe sede do Instituto Cervantes, forman parte da paixase madrileña. Inaugurouse o 29 de abril de 1918 foi un grande exemplo da obsesión de Antonio Palacios por replanificar urbanisticamente á cidade e engrandecela.
Círculo
de Belas Artes
Este edificio, adquiriu un destacado valor iconográfico na escenografía urbana do Madrid de principios do século XX. Permancerá sempre coma un símbolo da cidade. O proxecto quixo axuntar a grandiosidade arquitectónica e ornamental coa función artística, cultural e lúdica da institución.
A súa pegada
no metro
madrileño
Antonio Palacios foi o creador dos deseños e da estética das primeiras liñas do Metro madrileño, da organización dos seus accesos e do logotipo do rombo de Metro, entre outros moitos traballos.
